എക്സ്പയറി ഡേറ്റ് കഴിഞ്ഞ
മന്ത്രങ്ങൾ പാക്കറ്റിലാക്കി
വിൽക്കുന്ന തിരക്കിലാണ്
പൂജാരി.
ഹോമധൂമങ്ങളിലെ ക്രമാതീതമായ
സി.എഫ്.സി
മനസ്സിന്റെ ഓസോൺ പാളിയിൽ
വിള്ളലാവുന്നു.
വിഷാംശം കൂടിയ
ചിതാഭസ്മം കലങ്ങിയ
നീർപ്പരപ്പിൽ പരലുകൾ ചത്തുപൊന്തുന്നു…..!
ഭാംഗിന്റെ.. ചരസ്സിന്റെ…
ശൈലമുടിയിൽ
ധ്യാനം പൂണ്ട്
ബ്രഹ്മം തൊട്ട്
സൂര്യചന്ദ്രായനങ്ങൾ…
ഓർമ്മകളുടെ അശാന്ത തടങ്ങളിൽ
വീണ്ടും ഇരുൾ മറഞ്ഞ് കുറുകുന്നു…….
വീണ്ടും ഇരുൾ മറഞ്ഞ് കുറുകുന്നു…….
അന്തരീക്ഷമില്ലാത്ത അന്യഗ്രഹങ്ങളെ
മുന്നിൽ മുട്ടികുത്തി ഇരുത്തി കരയിച്ച
ബിസ്മില്ലയുടെ ഷഹനായിയും
നിലാവ് വിഭൂതിയായ് പെയ്തിറങ്ങിയ
നീല രാത്രികളും….!!!
മുകിൽ ഭാണ്ഡം മുറുക്കി
തിരിച്ചിറങ്ങുന്നു…
അകാശ ഗുഹയിലെ
മഴവിൽ സംന്യാസി.
അപ്പോഴും…
കിതയ്ക്കുന്ന
രുദ്രാക്ഷ ജന്മങ്ങൾക്കിടയിലൂടെ…
പുണ്യപാപങ്ങളിൽ തട്ടിത്തടഞ്ഞ്…
പുണ്യപാപങ്ങളിൽ തട്ടിത്തടഞ്ഞ്…
പകലിരവുകൾ പകുത്ത്
തളർന്നൊഴുകുന്നു…
കണ്ണീർ ഗംഗ….!!!
