Thursday, June 21, 2012

പാസ് വേർഡ്




ഞാൻ പറഞ്ഞാൽ
നിനക്കു മനസ്സിലാകുന്ന
വാക്കുകൾ
നമ്മൾ എന്നോ
ആക്രി വിലക്ക് തൂക്കി വിറ്റിരിക്കുന്നു!
പിന്നെയും മിച്ചം വന്ന
രഹസ്യങ്ങളുമായ്
പാസ് വേർഡുകളിലേക്ക്
പലായനം ചെയ്തിരിക്കുന്നു നമ്മൾ.
പാസ് വേർഡ്
വെറും കുത്തുകളായി തെളിയുന്ന
സൈബർ വാൽമീകം..!
നീ ഒന്നു മറന്നു പോയാൽ
എനിക്ക്
ഒരു ലോകം തന്നെ
നഷ്ടമാവുന്ന
മായികമന്ത്രം!
ഏലസ്സിനുള്ളിൽ തകിടു പോലെ
തീവ്രവാദിക്ക് സയനൈഡ് പോലെ
സ്വന്തം മിടിപ്പുകൾക്കുള്ളിൽ
ഒളിപ്പിച്ചു വെച്ച് കാക്കേണ്ടിയിരിക്കുന്നു.
മുഖം മൂടി ധരിച്ച ഈ അക്ഷരങ്ങൾ!
നമുക്ക്
ഓണവും വിഷുവും
വാവും ഹർത്താലും
പെരുന്നാളും പിറന്നാളും
ആഗസ്റ്റ് പതിനഞ്ചും ആണ്ടുകുർബ്ബാനയും
പ്രണയവും പരിഭവവും
എണ്ണിയാലൊടുങ്ങാത്ത ഏനാന്തങ്ങളും
ഇനിയുമെത്ര കൊണ്ടാടാനുള്ളതാ
ഈ മോണിറ്റർ മുറ്റത്ത്!
അതുകൊണ്ട്,
ഒരു കടമ്മനിട്ടത്താളത്തിൽ ഇങ്ങനെ പാടാം
“കുഞ്ഞേപാസ് വേർഡ് മറക്കരുത്
കുഞ്ഞേപാസ് വേർഡ് മറക്കരുത്…”

No comments:

Post a Comment